土生仔司長羅司臨別抽波，大戰議會議員，看得坐在螢光幕前的顛子大呼過癮。羅司大概知道自己時日無多，亦無更上一層樓之機會，所以言談之間，毫不掩飾自己對呢班所謂尊貴議員嘅厭惡，又斥佢地不做功課，唇槍舌劍，直搔癢處，真係有借羅司之言，澆顛子胸中塊壘之感，不亦快哉!

顛子一向推崇我地偉大祖國嘅三權合作、由黨領導一切嘅體制，所以覺得，係濠江呢個所謂行政主導嘅地方，根本就唔需要呢班議員存在，甚至乎，澳門成個政治制度當中，最浪費資源嘅，就係呢個聲稱代表民意嘅立法會。市民都有眼睇，呢啲尊貴議員所謂嘅監察政府，只不過係係議會發表一啲假大空嘅偉論，又或者揾人代筆寫一啲小學雞水平嘅質詢，扮嘢監察政府，雖然只係做場戲，如果你地演技好啲，交足貨，顛子都冇咁焗氣，只可惜除咗個別幾個之外，絕大部分議員嘅發言都係言不及義，廢話連篇，水平真係令人慘不忍睹。而政府要立嘅法，永遠都係百分之百通過，典型嘅橡皮圖章，你話呢班友仔，對社會究竟有乜嘢實際貢獻，套用鄰埠政客劉慧卿嘅一句口頭禪，顛子真係睇唔到囉。

偏生呢三十幾位人兄人姐，就算唔計立法會運作所耗費嘅公帑，人人個個月都抖緊幾皮嘢人工，呢啲全部都係民脂民膏，政府淨係出糧比佢地，一個月已經要洗百幾兩百粒，一年幾千萬，仲有其他津貼，呢樣嗰樣，計計埋埋，收入認真和味，可憐我地呢啲納稅人，錢花得不明不白，人地有名有利，我地就乜嘢都得唔到。佢地嘅作用，只不過係好似強國嘅政協一樣，作為政治花瓶而存在，人為地製造錯覺，比澳門人以為自己係政治上面有say而已，同時呃下一啲不明真相嘅外國政府和外國人，等佢地以為澳門政制無論點衰都好，始終有一丁點兒民主成份。

然而，醉眼看世界如顛子者，一旦看破呢個局，便知道呢個民主錯覺係幾咁昂貴，性價比係幾咁低，倒不如直接撤掉立法會，將錢現金分享比市民，相信會實際好多，起碼顛子可以買多幾樽酒飲下，一醉解千愁。

因為呢班尊貴議員，令顛子想起曾經聽過嘅一則頗為粗鄙卻一語中的嘅笑話。話說有人問一位強國高官，政協究竟有啲乜嘢功能，可否稍加說明。高官於是打了一個比方說：政協嘅功用就好似男人嘅陰囊，男人冇咗佢唔得，但又冇乜實用，開心嘅時候冇佢份，但瀨嘢一定唔少得佢。呢個比喻，真係夠晒形象化，用來形容濠江議會，顛子認為同樣貼切。

雖然發了一番牢騷，但顛子知道，立法會呢一班代議士，將會千秋萬世，永續存在，成日在顛子面前篤眼篤鼻，繼續蛀食社會資源，可惜羅司即將下台，微斯人也，以後冇人會替顛子出番啖氣了。

作者：顛子